പഠനോപകരണങ്ങളുടെ വിതരണം



എല്ലാ വർഷവും പത്തനംതിട്ട ജില്ലയിലെ കൊക്കാത്തോട് ആദിവാസി മേഖലയിലുള്ള ഗവൺമെന്റ് സ്കൂളിലെ വിദ്യാർഥികൾക്ക് സൗജന്യ നോട്ട്ബുക്കുകൾ, യൂണിഫോം, ബാഗുകൾ, പെൻസിലുകൾ, പേനകൾ, ഇൻസ്ട്രുമെന്റ് ബോക്സുകൾ, കാൽക്കുലേറ്ററുകൾ കുടകൾ, ടിഫിൻ ബോക്സുകൾ എന്നിങ്ങനെ ഒരു സ്കൂൾ വിദ്യാർത്ഥിക്ക് ആവശ്യമായ എല്ലാ തരത്തിലുള്ള സാധനങ്ങളും ടീച്ചർ നേരിട്ട് എത്തിക്കുകയും കുട്ടികളോട് സംവദിക്കുകയും ചെയ്യുന്നു.

വിദ്യാജ്യോതി

ഒരു എച്ച്ഐവി പോസിറ്റീവായ വിദ്യാർത്ഥി ഉൾപ്പെടെ സാമ്പത്തിക ബുദ്ധിമുട്ട് നേരിടുന്ന 15 അനാഥരായ വിദ്യാർത്ഥികൾക്കുള്ള എല്ലാ തരത്തിലുള്ള വിദ്യാഭ്യാസ പ്രോത്സാഹനങ്ങളും സഹായങ്ങളും ഒരുക്കുന്ന പദ്ധതിയാണ് വിദ്യാജ്യോതി.

"വിധിയെഴുതും വീഥികളിൽ" സ്നേഹസ്പർശം, സാഫല്യം, വിജയത്തിലേക്കുള്ള പ്രത്യാശ

കഴിവും യോഗ്യതയും ഉണ്ടായിട്ടും സാമ്പത്തിക ബുദ്ധിമുട്ട് കാരണം ഉന്നത വിദ്യാഭ്യാസം നിഷേധിക്കപ്പെടുന്ന വിദ്യാർഥികൾക്ക് ഒരു ആശ്രയവും അവസരവുമാണ് ഈ പദ്ധതി. വീട് നിർമ്മിച്ച് നൽകിയ കുടുംബങ്ങളിലേതും, ആദിവാസി മേഖലകളിലെയും, എച്ച്ഐവി തുടങ്ങിയ രോഗങ്ങൾ നേരിടുന്ന മാതാപിതാക്കൾ ഉള്ള കുട്ടികൾക്കും മുൻഗണന നൽകിക്കൊണ്ട്‌ സർക്കാരോ /സർക്കാർ അംഗീകൃത വിദ്യാഭ്യാസ സ്ഥാപനങ്ങളിലെ കഴിവും യോഗ്യതയുമുള്ള ഇരുപതോളം വിദ്യാർഥികൾക്ക് 5000/- രൂപയുടെ സ്കോളർഷിപ്പും അവരുടെ സ്വയംപര്യാപ്തത വളർത്തുവാനുള്ള പരിശീലനങ്ങളും നൽകുന്ന പദ്ധതിയാണിത്.

അക്ഷര കുടയൊരുക്കി 20 ഗ്രന്ഥശാലകൾ

പുതുതലമുറയിലെ വിദ്യാർത്ഥികൾ നേരിടുന്ന ഏറ്റവും വലിയ ഗുരുതര പ്രശ്നമാണ് കുറഞ്ഞുവരുന്ന വായനാശീലം. അതിനു മാറ്റം വരുത്തി വായനാശീലമുള്ള ഒരു നല്ല തലമുറയെ വാർത്തെടുക്കാൻ ഡോക്ടർ എം എസ് സുനിൽ തന്നെ നേരിട്ട് മുൻകൈയ്യെടുത്ത് സുഹൃത്തുക്കളിൽ നിന്നും ബന്ധുക്കളിൽ നിന്നും മറ്റു വിദ്യാർത്ഥികളിൽ നിന്നും മലയാള മനോരമ, മാതൃഭൂമി തുടങ്ങിയ പത്രമാധ്യമങ്ങളുടെയും ഡിസി ബുക്സിന്റെയും സഹായത്തോടെ പുസ്തകങ്ങൾ ശേഖരിച്ച് ഗ്രന്ഥശാലകൾ നിർമ്മിക്കുന്നു. പത്തനംതിട്ട സബ് ജയിൽ, ശബരി ബാലാശ്രമം കോന്നി, കൊക്കാത്തോട് ആദിവാസി മേഖലകൾ തുടങ്ങി നിരവധി ഇടങ്ങളിൽ ഇരുപതോളം ഗ്രന്ഥശാലകൾ നിർമ്മിക്കുവാനായി സാധിച്ചു.

സോഷ്യൽ വർക്ക്‌ വിദ്യാർത്ഥികൾക്ക് ഇന്റേൺഷിപ് പ്രോഗ്രാം.

സാമൂഹിക പ്രതിബദ്ധതയുള്ള തലമുറയെ വളർത്തിയെടുക്കുവാൻ, സാമൂഹിക പ്രവർത്തനത്തിൽ ബിരുദ-ബിരുദാനന്തര ( ബി.എസ്.ഡബ്ലിയു / എം.എസ്.ഡബ്ലിയു) വിദ്യാർഥികൾക്ക് ഡോ. എം. എസ്. സുനിൽ ഫൗണ്ടേഷനിൽ ഇന്റേൺഷിപ് ചെയ്യുവാനുള്ള അവസരം ഒരുക്കുകയും സർട്ടിഫിക്കറ്റ് നൽകുകയും ചെയ്യുന്നു.